Агентот за модели Даниел Сиад, кој беше осомничен дека регрутирал жени за покојниот сексуален престапник Џефри Епстин, е пронајден мртов во Франција, објави Би-би-си. Француските власти отвориле истрага за неговата смрт, но засега не се познати околностите под кои починал.
Сиад (69) бил пронајден мртов во својот дом во Коломб, во францускиот департман От-де-Сен. Надлежните работат на утврдување на причините за неговата смрт.
Името на шведскиот државјанин, според објавените информации, се појавува околу 2.000 пати во документите поврзани со Епстин, кои беа објавени од Министерството за правда на САД.
Сиад наводно дејствувал како регрутер за Епстин во Франција. Во 2022 година, една Французинка изјавила пред полицијата дека со Епстин се запознала преку Сиад, по што, според нејзиното сведочење, станала жртва на неговите активности.
Во интервју за францускиот медиум БФМТВ во мај 2026 година, Сиад признал дека го познавал Епстин и дека го запознал со голем број млади жени. Сепак, тој тврдел дека на жените им се претставувал како директор за кастинг на модната компанија „Викторија сикрет“.
Според медиумските извештаи, Сиад патувал во повеќе земји од крајот на 2000-тите до 2017 година, каде што наводно барал модели во име на Епстин. Меѓу државите каде што престојувал се Полска, Чешка, Јужноафриканската Република, Мароко, Куба и Франција.
Сиад, исто така, бил предмет на пријави од пет жени кои го обвиниле за силување и сексуално насилство.