Британскиот премиер Ендру Бернам најави дека Владата повторно ќе ја разгледа политиката за предвремено ослободување на затворениците. Тој посочи дека заедно со новиот министер за правда Алекс Норис ќе направат детална анализа пред да се донесат натамошни одлуки.
Бернам изјави дека не може да се игнорира притисокот врз затворскиот систем во Велика Британија, кој се соочува со недостиг на затворски капацитети, но нагласи дека сака внимателно да бидат разгледани сите аспекти на ова прашање.
„Не можам да кажам дека можам целосно да ја сменам таа политика, но детално ќе ја разгледам пред да продолжиме понатаму“, изјави Бернам.
Законот за изрекување на казни, кој треба да стапи во сила во септември, предвидува можност илјадници осуденици да бидат предвремено ослободени, со цел да се намали преоптовареноста на британските затвори.
Според актуелните правила, голем број затвореници се ослободуваат по издржување на 40 проценти од казната, а од септември тој праг ќе биде намален на 33 проценти.
Од британската влада истакнуваат дека новиот закон нема да се однесува на најопасните криминалци, односно на лицата осудени на долготрајни затворски казни или на доживотен затвор.