Најмалку две лица загинаа, а уште четворица се повредени во пукање што се случи на уличниот фестивал „Салса на Сент Клер“ во канадскиот град Торонто, соопшти локалната полиција.
Полицијата добила пријава за активен напаѓач околу 20:12 часот по локално време, по што на местото на настанот биле пронајдени шест лица со прострелни рани. Две од нив им подлегнале на повредите на самото место.
Полицијата: Станува збор за размена на оган
Заменик-началникот на полицијата во Торонто, Франциско Баредо, изјави дека првичната истрага покажува оти дошло до размена на оган меѓу две лица. На местото на настанот биле пронајдени две огнени оружја, но засега никој не е уапсен.
Баредо го опиша местото на настанот како „многу хаотично“, наведувајќи дека во моментот на пукањето на фестивалот имало околу 13.000 посетители. Полицијата истражува три поврзани места на злосторството и ги повика сите очевидци и лица кои располагаат со информации да се јават.
Поради истрагата, граѓаните се повикани да го избегнуваат тој дел од градот, каде што и натаму е распоредено големо полициско присуство.
Осуди од канадските власти
Канадскиот премиер Марк Карни изјави дека е „згрозен“ од трагедијата и изрази сочувство до семејствата на загинатите, како и до повредените и сите погодени од инцидентот.
Премиерот на покраината Онтарио, Даг Форд, го осуди, како што наведе, „бесмисленото насилство“ на фестивалот и порача дека одговорното лице мора да биде пронајдено и изведено пред правдата.
Фестивалот привлекува илјадници посетители
Инцидентот се случил на авенијата Сент Клер, позната по бројните продавници и ресторани во централниот дел на Торонто, каде што традиционално се одржува фестивалот „Салса на Сент Клер“. Годинашното издание на манифестацијата беше 22-ро по ред