Поделени ставови за казната за Васил Јованов
Казната за Васил Јованов од 12 години затвор за усмртувањето на Фросина Кулакова на пешачки премин на булеварот „Партизански одреди“ во Скопје предизвика поделени реакции во јавноста. Едни сметаат дека казната е во согласност со судските стандарди, додека други бараат повисока казна. Адвокатот Владо Бангиевски оценува дека пресудата на Основниот кривичен суд во Скопје е во рамките на судската пракса за вакви кривични дела. Според него, судиската проценка при одмерувањето на казната зема предвид отежителни и олеснителни околности. Пресудата за трговија со дрога била правилно земена како отежителна.
„Висината на казната е очекувана според судската пракса. Разбирлива е реакцијата на јавноста поради последиците од делото. Јавноста има право на револт, особено поради загубата на млад живот, што е голема трагедија, но судот е единствено меродавен да одлучува и казнува“, изјави Бангиевски за „Локално“.
Протести за посилна правда
Семејството на Кулакова и граѓани вчера протестираа, барајќи посилна правда за трагичната смрт на младата девојка, незадоволни од казната за Јованов. Тие бараат максимална казна од 20 години без олеснителни околности и дисциплинска постапка против судијката Снежана Марковска. Таткото Тодор Кулаков ја критикува одлуката на Врховниот суд да ја укине пресудата од 3 години и 10 месеци за трговија со дрога и да го врати случајот на Апелација. Според него, ова е обид за правна конфузија. На протестот се приклучија семејства што изгубиле блиски на сличен начин.
„Бараме максимална затворска казна за Васо, 20 години без олеснителни околности. Одбраната тврди дека е примерен спортист, но не споменува дека бил избркан од ракометен клуб поради тепачки. Судот даде само 12 години за лице кое беше пијано, без дозвола, на црвено светло“, изјави Тодор Кулаков.
- „Очигледна е намерата со игра на датуми да се создаде правна конфузија. Одбраната сега ќе бара на Апелација да му се намали казната“, додаде Кулаков.
„Бараме дисциплинска постапка и суспендирање на судијката Марковска, која ја донесе пресудата. Мора да одговори зошто жалењето на обвинетиот го смета поважно од тоа што дејствувал под алкохол, без дозвола и со криминално минато, преминувајќи преку Фросина. Судскиот совет да утврди дали имало пристрасност, а судијката да биде отстранета“, рече Кулаков.