Американските сили на Блискиот Исток се подготвени веднаш да продолжат со воени операции доколку Иран не се согласи на мировен договор, изјавија високи претставници на американската војска.
Како дополнителен притисок врз Техеран, САД веќе спроведуваат поморска блокада, при што ги запираат бродовите што се обидуваат да влезат или да излезат од иранските пристаништа.
„Иран може да избере светла иднина и се надеваме дека ќе го стори тоа за доброто на својот народ“, изјави министерот за одбрана Пит Хегсет на прес-конференција во Пентагон.
„Но, доколку донесе погрешна одлука, ќе следуваат блокада и напади врз инфраструктурни и енергетски објекти“, додаде тој.
Началникот на Генералштабот, генерал Ден Кејн, истакна дека американските сили се „подготвени да продолжат со големи воени операции буквално во моментот кога ќе ја добијат наредбата“.
Тој додаде дека американските воени бродови ќе пресретнуваат и ќе предупредуваат секој брод што се обидува да ја пробие блокадата, без разлика на знамето под кое плови.
„Ќе употребиме сила ако не се почитува блокадата“, нагласи Кејн, додавајќи дека мерките се спроведуваат и во иранските територијални и во меѓународните води.
Според него, досега 13 бродови биле вратени откако се обиделе да ја пробијат блокадата.