Сајбербезбедноста на енергетскиот сектор добива конкретна институционална и стручна основа. Министерството за енергетика, рударство и минерални суровини, во тесна соработка со Програмата за развој на Обединетите нации (УНДП), Регулаторната комисија за енергетика и другите релевантни институции и компании, реализираше активности за зајакнување на заштитата на критичната енергетска инфраструктура. Како резултат на иницијативата „Сајбербезбедност за отпорна дигитална иднина“, изработени се Методологија за воспоставување секторски Енергетски CSIRT и сеопфатна Проценка на сајбербезбедноста во енергетскиот сектор.
Методологијата за воспоставување Енергетски CSIRT претставува практична основа за формирање специјализиран секторски механизам за одговор на компјутерски безбедносни инциденти. Таа ги поставува основите за координирано постапување, навремена размена на информации, известување за закани и инциденти, како и оперативна соработка меѓу енергетските претпријатија, државните институции и надлежните структури за сајбербезбедност.
Со воспоставувањето на ваков специјализиран механизам, енергетските субјекти ќе добијат појасна рамка за тоа како да постапуваат при безбедносни инциденти, кон кои органи да се обратат и кои информации да ги споделат. Ова прашање е особено значајно за меѓусебно поврзаниот енергетски систем, каде што евентуален безбедносен инцидент кај еден оператор може лесно да предизвика сериозни последици и врз другите витални делови од националната инфраструктура.
Вториот значаен резултат е сеопфатната Проценка на сајбербезбедноста во енергетскиот сектор, подготвена преку темелен консултативен процес со институциите и енергетските претпријатија. Овој стратешки документ ја анализира постојната состојба и ги идентификува сите клучни потреби за унапредување на сајбер-заштитата, нудејќи препораки, насоки и приоритетни чекори за понатамошно системско дејствување.
Проценката треба да им послужи на енергетските субјекти како практична основа за препознавање на слабостите, утврдување на клучните приоритети и јакнење на сопствените безбедносни капацитети. Ваквиот пристап подеднакво ги опфаќа големите компании и субјектите со ограничени ресурси, со јасна цел заштитата да прерасне во заеднички приоритет на целиот стопански сектор.
Реализацијата на овие мерки претставува резултат на иницијативата поддржана од Владата на Словачка и спроведена со стручна помош на УНДП. Ресорното министерство го поддржа процесот уште од самиот почеток и преку постојан дијалог со регулаторот и стопанството овозможи проширување на опфатот преку изработка на двата фундаментални документи.
Следниот чекор предвидува препораките и методолошките насоки да се преточат во конкретни процедури, активности и јасно распределени институционални одговорности. Тоа подразбира зајакнување на стручните ресурси, постојана едукација на инволвираниот кадар, практични симулациски вежби и подобра координација меѓу сите субјекти што управуваат со виталната инфраструктура.
Сајбербезбедноста претставува клучен сегмент од целокупната енергетска безбедност во државата. Заштитата на дигиталните системи преку кои се управуваат производството, преносот, дистрибуцијата и редовното снабдување со струја е во директна врска со сигурноста на услугите за населението и индустријата.
Министерството за енергетика, рударство и минерални суровини ќе продолжи да ја унапредува соработката со државните органи, независниот регулатор, операторите на пазарот и странските партнери за обезбедување отпорен и сигурен систем.