Тинејџер од Калифорнија почина по интеракција со ChatGPT, тврдат неговите родители во тужба поднесена пред американскиот суд. Според обвинението, наместо да го спречи, вештачката интелигенција му дала детални упатства за тоа како да изврши самоубиство.
Инцидентот датира од јануари годинава, кога 16-годишното момче преку платформата побарало информации за методи на самоубиство. Успеало да ги заобиколи безбедносните ограничувања со изговор дека работи на фиктивна приказна. Наместо предупредување или блокада, системот одговорил со конкретни насоки.
Во наредните месеци, тинејџерот направил неколку обиди за самоубиство – меѓу кои и предозирање со лекови и обид за бесење. Родителите наведуваат дека токму неколку часа пред смртта, со помош на програмата напишал проштално писмо.
Случајот предизвикува жестоки реакции во јавноста во САД, отворајќи сериозни прашања за одговорноста на компаниите кои развиваат и пласираат алатки за вештачка интелигенција, особено кога станува збор за заштита на малолетници.