Затвореник на возраст од 35 години денеска успеал да избега од затворот во Дуизбург, Германија. Станува збор за Србинот Саша Д., чие бегство го потврди Министерството за правда на Северна Рајна-Вестфалија.
Според информациите од министерството, затвореникот е осомничен дека ги отстранил решетките од прозорецот на неговата ќелија, а потоа ги исекол. По тоа, тој се провлекол низ многу тесниот отвор, се искачил по фасадата и прескокнал заштитна бариера поставена на работ од покривот.
Саша Д. потоа успеал да го напушти затворскиот комплекс преку покривот и да избега на слобода.
Министерот за правда на Северна Рајна-Вестфалија, Бенџамин Лимбах, изјави дека главен приоритет е неговото што побрзо апсење. Тој најави и темелна истрага за околностите под кои дошло до бегството.
„Главен приоритет е брзо апсење на избеганиот притвореник“, изјави Лимбах, додавајќи дека инцидентот ќе биде темелно истражен.
Саша Д. се наоѓа во притвор од 10 февруари, под сомнение за кражба. Според германските власти, тој се смета за таканаречен „патувачки престапник“, односно криминалец без постојана адреса во Германија, кој влегува во земјата со цел да извршува кривични дела.
Бегалецот во мај годинава бил осуден на шест години затвор поради две кражби извршени во Оберхаузен. Сепак, како што објави „Билд“, пресудата сè уште не е правосилна.