Катар склучува долгорочни договори за набавка на големи количества течен природен гас од американски производители, со цел да се заштити од евентуални последици од воена ескалација во Иран. Ова го потврди извршниот директор на „КатарЕнерџи“ и министер за енергетика на земјата, Саад Шерида Ал-Кааби, образложувајќи ги чекорите што ги презема државната енергетска компанија.
Ал-Кааби укажа дека какво било затворање на Ормускиот теснец веднаш би довело до драстичен скок на цените на гасот на глобалниот пазар. Со купување на течен природен гас (ТПГ) од други производители, компанијата би можела да продолжи да остварува приходи во такво сценарио – финансиски средства што инаку би биле изгубени поради неможноста за извоз на сопствените резерви.
Ова е првпат висок претставник на „КатарЕнерџи“ јавно да објасни како компанијата планира да ги надомести потенцијалните загуби предизвикани од регионален конфликт, како и да се заштити од проблеми со транзитот низ стратешкиот морски коридор. Ал-Кааби појасни дека компанијата би можела да оствари профит од разликата меѓу пониските цени на гасот во Соединетите Американски Држави и значително повисоките цени на европскиот пазар, што директно ќе помогне во компензирањето на извозните загуби.
Планот на „КатарЕнерџи“ предвидува обезбедување на значително повеќе од седум милиони тони ТПГ годишно. Моментално компанијата води преговори со повеќе производители, меѓу кои и американската фирма „Венчр Глобал“ (Venture Global), со цел обезбедување најповолни комерцијални услови.
Катар веќе потпиша 20-годишен договор за купување на три милиони тони ТПГ годишно од американски постројки со кои управува австралиската енергетска компанија „Вудсајд“ (Woodside). Претходно беа склучени и два долгорочни договори со американскиот производител „Cheniere Energy“ за испорака на до четири милиони тони годишно, кои ќе траат сè до 2054 година. Со ова, за период од само две недели, катарската државна компанија обезбеди седум милиони тони гас годишно.
„Очекуваме уште договори“, изјави Ал-Кааби.
Испораките од компанијата „Cheniere Energy“ се очекува да започнат во 2031 година, а раководството планира во текот на годинава да парафира дополнителни договори со времетраење од 20 до 25 години со американски и други глобални добавувачи. Преговорите со „Venture Global“ предвидуваат испорака на дополнителни три милиони тони течен природен гас годишно.
Купениот американски гас нема да може директно да ги замени катарските испораки за постојните купувачи доколку дојде до блокада на Ормускиот теснец. Според Ал-Кааби, условите во постојните долгорочни договори прецизно го одредуваат терминалот од кој се испраќа товарот, како и крајната дестинација, па пратките од САД не можат автоматски да послужат како алтернатива за договорениот катарски извоз.
Катар покрива околу една петтина од вкупниот глобален извоз на ТПГ, при што сите поморски пратки задолжително поминуваат низ Ормускиот теснец. Кон средината на март, иранските сили извршија напад врз постројките во Рас Лафан во Катар, како реакција на израелскиот напад врз иранското гасно поле „Јужен Парс“ (South Pars). Овој напад уништи 17 проценти од вкупниот капацитет на Катар за извоз на енергенсот.
Проценките покажуваат дека за санирање на штетите во Рас Лафан ќе бидат потребни меѓу три и пет години, што создава дефицит од 12,8 милиони тони ТПГ годишно. Поради ваквите оштетувања, најавена е можност за активирање на клаузулата „виша сила“ (force majeure) за договорите со партнери од Италија, Белгија, Јужна Кореја и Кина, која веќе е продолжена до крајот на годината.
Производството во полн капацитет би можело да се обнови во рок од една недела по евентуално постигнување мировен договор на Блискиот Исток, под услов да има доволно транспортни бродови. Сепак, сè додека не завршат градежните и техничките санации, производството нема да надмине 83 отсто од претходниот капацитет.