Консумирањето умерена количина темно чоколадо може да придонесе за подобро расположение, покажува најновата во низата студии посветени на неговите потенцијални здравствени придобивки. Истражувањето, објавено во списанието „Depression and Anxiety“, укажува дека темното чоколадо може позитивно да влијае врз чувството на среќа.
Повеќе претходни истражувања ги разгледувале можните ефекти на темното чоколадо врз здравјето. Студија објавена во „The Journal of Nutrition“ покажала дека консумирањето мала количина темно чоколадо секој ден може да придонесе за намалување на нивото на LDL холестеролот.
Друго истражување, презентирано на годишниот состанок на Американската академија за неврологија, покажало дека јадењето темно чоколадо може да го намали ризикот од смрт како последица на мозочен удар за речиси 50 проценти. Студија објавена во списанието „Appetite“, пак, утврдила дека консумирањето темно чоколадо најмалку еднаш неделно може да ги подобри меморијата, размислувањето и когнитивните функции.
Во студијата објавена во „Depression and Anxiety“ било утврдено и дека темното чоколадо може да придонесе луѓето да се чувствуваат посреќно. Тоа содржи психоактивни соединенија, меѓу кои и фенилетиламин – невромодулатор кој ги регулира емоционалните состојби. Според истражувањето, ефектите врз подобрувањето на расположението можат да траат и по завршувањето на консумирањето.
Прегледот на повеќе од 30 студии, објавен во списанието „Nutrients“, покажал дека луѓето кои секојдневно јадат мала количина темно чоколадо може да го намалат ризикот од кардиоваскуларни заболувања. Како можни причини се наведуваат намалувањето на LDL холестеролот, крвниот притисок и нивото на шеќер во крвта.
Истражувањата не покажале негативно влијание врз телесната тежина на учесниците, процентот на телесни масти или обемот на половината. Во студијата за подобрување на расположението биле доволни 14 грама темно чоколадо дневно, додека количините над оваа граница не предизвикале дополнителни ефекти. Во истражувањето за превенција на кардиоваскуларните заболувања, како доволна била наведена дневна количина од 19 до 42 грама.
Важен е и процентот на какао во чоколадото. Иако некои производи од темно чоколадо содржат само 40 проценти какао, студиите покажуваат дека најголемите придобивки се поврзуваат со производите што содржат најмалку 60 проценти какао. Во кардиоваскуларната студија учесниците консумирале темно чоколадо со 70 проценти какао.
Во студијата се посочува и дека е важно да се избере темно чоколадо со најмалку 70 проценти какао кое потрошувачот може редовно да го консумира.