Алкохол над дозволеното и низа апсења низ државата
Тешка сообраќајна несреќа со повеќе повредени лица се случи по полноќ во Битола, при што е утврдено дека еден од возачите управувал возило под дејство на алкохол. Истовремено, полицијата во текот на ноќта лиши од слобода уште неколку возачи во повеќе градови низ државата, кај кои биле измерени високи концентрации на алкохол во крвта.
На 14 јануари 2026 година, во 00:32 часот, во СВР Битола било пријавено дека на крстосницата меѓу улиците „Филип Втори Македонски“ и „Батаљон Стив Наумов“ дошло до судир меѓу патничко возило „форд ескорт“, управувано од Н.Б.(36) од Битола, и „дачиа сандеро“, управувано од Н.М.(61) од Битола.
Во несреќата, сопатничка од возилото „дачиа сандеро“ се здобила со тешки телесни повреди, додека со телесни повреди се здобиле двајцата возачи и сопатничките Ј.Т.(24) и Ф.Т.(24), двете од Битола. Повредите биле констатирани во Клиничката болница Битола.
По наредба на јавен обвинител, извршен бил увид, при што било утврдено дека возачот на „форд ескорт“ управувал возило со 1,81 промили алкохол во крвта. Тој веднаш бил лишен од слобода.
Возачи со над 2 промили алкохол запрени во повеќе градови
Полицијата регистрираше и други сериозни прекршоци. На 13 јануари во 23:35 часот во Куманово бил лишен од слобода А.П.(28), кај кого биле измерени 2,55 промили алкохол.
Во Велес, на 14 јануари во 00:52 часот, бил приведен В.О.(50) со 1,80 промили алкохол, додека во Неготино, во 02:50 часот, бил лишен од слобода Т.Б.(38) со 1,54 промили.
Во Македонска Каменица, полицијата го привела Д.Р.(72), кој управувал возило со 2,27 промили алкохол, а во Кичево бил задржан И.К.(44) од Скопје со 1,84 промили. Во Дебар, кај Љ.М.(60) биле измерени 1,83 промили, додека во Битола, на улицата „Довлеџик“, бил приведен Д.А.(58) со 1,92 промили алкохол во крвта.
Кривични пријави за безобѕирно управување
Сите возачи биле веднаш исклучени од сообраќај и задржани во полициски станици. По целосно документирање на настаните, против нив ќе бидат поднесени кривични пријави по член 297-а од Кривичниот законик за „безобѕирно управување со моторно возило“.