Животот и кариерата на Тоше Проески ќе бидат претставени преку игран филм, играна серија и документарна серија. Проектот, кој сè уште е во подготовка, ќе се фокусира на човекот зад големата музичка ѕвезда и ќе понуди нови детали и перспективи за неговиот живот надвор од сцената.
Првиот поголем увид во креативниот и истражувачкиот процес беше претставен во Ровињ. Проектот го презентираа продуцентот Пеце Талески, авторот Игор Стоименов и сценаристите Милана Влаовиќ и Андреј Волкашин.
Тие посочија дека главниот предизвик е да се раскаже поинаква приказна за Тоше, имајќи предвид дека неговата кариера и голем дел од животот веќе ѝ се добро познати на јавноста.
Во центарот на филмот и сериите ќе бидат неговиот живот надвор од сцената, личните желби и соништа, верата и стремежот кон обично секојдневие. Авторите имаат намера да ја прикажат личноста што се наоѓала зад музичката кариера, концертите, медиумското внимание и статусот на голема регионална ѕвезда.
Една од главните нишки во приказната ќе биде реченицата што Тоше ја кажал во своето последно интервју, само неколку часа пред трагичната смрт: „И јас би сакал да го познавам тој Тоше“.
Авторот на проектот, Игор Стоименов, вели дека токму оваа реченица ја отсликува суштината на приказната што тимот сака да ја раскаже.
„Сакам да го пронајдам Тоше – момчето од Крушево, од малото место на покривот на Македонија. Сакам да покажам кој стоел зад гласот, концертите, насловните страници и митот“, вели Стоименов.
До својата 26-та година, Тоше со својот тенор се движеше низ различни музички жанрови – од поп и рок до традиционална музика и оперски арии. Авторите посочуваат дека паралелно со растот на неговата популарност, останувал сè помалку простор за неговиот приватен живот.
Според продуцентот Пеце Талески, уште од почетокот било јасно дека приказната за Тоше не може целосно да се опфати само преку еден формат. Поради тоа, проектот истовремено се развива како игран филм, играна телевизиска серија и документарна серија.
Сценаристите Милана Влаовиќ и Андреј Волкашин открија дека тимот досега разговарал со голем број луѓе што го познавале Тоше и спровел повеќе интервјуа. Биле посетени и местата поврзани со неговиот живот, а се собирале достапни материјали, лични сведоштва и сеќавања.
Целта на истражувачкиот процес е од големиот број факти и веќе познати моменти да се издвои приказната за човекот што постоел надвор од рефлекторите.
Проектот сè уште се наоѓа во подготвителна фаза, а неговото претставување во Ровињ беше првата поголема презентација на досегашниот креативен и истражувачки процес.