Целосна поддршка од Владата: скапи интервенции, рехабилитација и лекување во странство
Повредените од дискотеката „Пулс“ ќе имаат целосна поддршка од Владата и Министерството за здравство. Ќе се финансираат интервенции, третмани и странски лекувања. Министерот Азир Алиу најави и изградба на Центар за протези во Скопје.
Министерот за здравство, Азир Алиу, од Штип истакна дека за секој процес кој бара дополнителни средства или интервенции, државата ќе излезе во пресрет. Повредените млади луѓе ќе добијат поддршка од институциите во рамки на долгорочен пристап.
Во Скопје ќе се гради Центар за протези
Алиу информираше дека е во подготовка изградба на Центар за протези, којшто досега недостигал во земјата. Веќе се водат разговори со стручни тимови од Словенија за соработка и трансфер на знаење.
Воедно, Алиу посочи дека експертски тимови од земјава и странство веќе направиле анализа на состојбите, како и дека дел од пациентите ќе бидат упатени на лекување во странство. Дополнително, во тек се подготовки за создавање соодветна инфраструктура за лекување и поддршка во рамки на државата.
Трета група од повредените на рехабилитација во Пониква
Во моментот третата група на повредени од дискотеката „Пулс“ се наоѓа на рехабилитација на Пониква. Со нив секојдневно работат лекари, физиотерапевти и друг здравствен персонал. Според министерот, програмата веќе покажува позитивни резултати.
Алиу додаде дека програмата за рехабилитација ќе продолжи сè додека младите повредени лица изразуваат интерес. Тој потсети дека веќе се формирани работни групи во рамки на Министерството за здравство и Владата, со цел изработка на долгорочна стратегија за поддршка и здравствена заштита на повредените.
Повредените од дискотеката „Пулс“ ќе бидат вклучени и во сите идни програми за медицинска, инфраструктурна и професионална поддршка. Според министерот, ќе се создадат услови за современ пристап кон секој пациент, независно од тежината на неговата повреда.