На 39-годишниот А.Д. од кумановското село Черкези му е определен осумдневен притвор поради закани упатени кон премиерот Христијан Мицкоски преку социјалните мрежи. Безбедносниот експерт Љубомир Ѓурчески оцени дека заканата морала да биде сфатена сериозно бидејќи, според него, дошла од лице познато по кривични дела, насилство и физички пресметки.
Во гостувањето во емисијата „Колегиум“ на ТВ Алфа, Ѓурчески изјави дека Центарот за компјутерски криминал при Министерството за внатрешни работи брзо ја лоцирал заканата, утврдил од која социјална мрежа и ИП-адреса била испратена и стигнал до лицето кое стоело зад неа.
– Мене ме радува фактот што брзо е интервенирано од Центарот за компјутерски криминал при МВР. Брзо лоцираа од каде доаѓа заканата, од која социјална мрежа и од која ИП-адреса – рече Ѓурчески.
Тој ја нагласи сериозноста на случајот и поради профилот на лицето кое на социјалните мрежи се заканило со јавна егзекуција на Мицкоски и упатило неумесни зборови кон неговото семејство.
Според тврдењето на Ѓурчески, станува збор за лице кое ѝ е добро познато на полицијата и кое претходно било поврзувано со кривични дела и прекршоци, насилство, физички пресметки и тепачки. Тој посочи дека дел од својата кариера во МВР ја поминал токму во регионот од каде што доаѓа лицето.
Ѓурчески процени дека заканата добива дополнителна тежина поради наводната поврзаност на лицето со организирани криминални структури. Тој посочи дека таквите групи можат да користат тешко насилство, па и да ангажираат платени убијци и ликвидатори за остварување на своите цели.
По идентификувањето на лицето, Обвинителството ги презело мерките во предистражната постапка и била издадена наредба за негово приведување. Од судот била побарана мерка притвор, која, според Ѓурчески, била и изречена.
– Добро е што се реагираше брзо. Испратена е силна порака кон организираните криминални структури во Македонија и се спречи ова да стане нечие секојдневие – оцени Ѓурчески.
Безбедносниот експерт потсети дека законите предвидуваат посебни кривични дела за заштита на избрани и именувани функционери. Според него, доколку институциите не реагирале навреме, ваквото однесување можело да се прошири и кон други носители на јавни функции.
– Ако не се реагираше брзо, ова можеше да продолжи и кон други – пратеници, судии, обвинители – предупреди Ѓурчески.
Тој оцени дека брзата интервенција спречила ваквите закани да станат секојдневие и истовремено испратила силна порака до организираните криминални структури во Македонија.