УКИНАТ ИМУНИТЕТОТ НА 13 ПРАТЕНИЦИ: Грција ја проширува истрагата за земјоделскиот скандал со ЕУ фондови

Парламентот донесе одлука во голема антикорупциска истрага

Одлука за одземање на имунитетот на 13 пратеници од владејачката Нова демократија донесе парламентот во Грција, во рамки на истрагата за наводни злоупотреби на земјоделски субвенции од Европска Унија.

Со оваа одлука се проширува постапката поврзана со случајот околу државната агенција ОПЕКЕПЕ, која управува со распределба на европски земјоделски средства.

Сомнежи за злоупотреба на над 22 милиони евра

Европското јавно обвинителство претходно отвори истрага против десетици сточари, осомничени дека со фалсификувани документи за пасишта добивале субвенции од европските фондови. Во дел од случаите се проверува и можна поврзаност со државни службеници и политички структури.

Според проценките, во периодот 2019–2024 година се присвоени над 22 милиони евра преку неточни податоци за земјиште.

Политички последици и пад на поддршката

Меѓу опфатените е и поранешниот министер за инфраструктура и транспорт Костас Караманлис, кој претходно повика на соработка со истрагата и изјави дека нема што да крие.

Случајот веќе предизвика политички последици, вклучително и оставки, додека во Грција се бележи пад на поддршката за Нова демократија на околу 25,7 отсто, иако партијата сè уште води пред опозициската ПАСОК.