Американскиот претседател Доналд Трамп соопшти дека е малку веројатно повторно да нареди воени напади врз Иран доколку има напредок во преговорите за нуклеарната програма на Техеран и повторното отворање на Ормутската Теснина. Тој ја повтори оваа позиција во интервју за Си-ен-ен, нагласувајќи дека понатамошниот развој на настаните зависи исклучиво од подготвеноста на иранските власти за соработка.
„Би го направил тоа доколку е потребно, но ние ги погодивме навистина силно. Затоа е малку веројатно дека ќе морам повторно да го направам тоа. Тие банкротираат“, рече Трамп.
Американскиот претседател појасни дека вооружените сили на Соединетите Американски Држави остануваат целосно подготвени за дејствување доколку се појави потреба од нови мерки на Блискиот Исток.
„Имам три носачи на авиони таму. Третиот штотуку пристигна. Тие се целосно подготвени и вооружени“, рече Трамп.
Тој исто така откри дека САД веќе имаат прецизно идентификувано низа клучни инфраструктурни цели во Иран во случај на ескалација на конфликтот, меѓу кои се наоѓаат мостови и електроенергетски капацитети.
„Имаме 38 мостови на нишан што можеме да ги уништиме буквално за еден час“, рече американскиот претседател.
Трамп нагласи дека сепак би сакал да се избегне целосното разорување на иранската витална инфраструктура доколку преговорите вродат со плод.
Осврнувајќи се на одбранбениот потенцијал на Техеран против евентуални идни воени удари, Трамп посочи дека иранските капацитети се во голема мера десеткувани.
„Ние сме незапирливи, бидејќи тие немаат противвоздушна опрема. Целата нивна противвоздушна одбрана е исчезната“, рече тој.