Македонската кик-бокс репрезентација забележа три победи и три порази во шест настапи на првиот натпреварувачки ден од Светското првенство во Лидо ди Језоло, Италија. Победи за националниот тим остварија Милан Нешевски, Глигор Николов и Марко Баснарков.
Нешевски имаше одличен настап и победи уште во првата рунда, кога неговата борба беше прекината.
Сигурна борба прикажа и Николов, кој го совлада својот противник со убедливи 3:0. Баснарков, исто така, забележа победа и обезбеди продолжување на својот настап на шампионатот.
Димитар Јачев и Драган Пандев ги загубија своите борби на татами, додека Давид Атанасовски беше поразен во рингот.
Македонските кик-боксери, кои настапуваат во своите возрасни категории, со борбите на светската сцена стекнаа драгоцено искуство.
Претседателот на федерацијата, Дејан Митровски – Урко, по завршувањето на денешната програма изрази задоволство од резултатите и прикажаните борби.
„Задоволен сум од денешните борби и успехот. Сепак, ова се млади борци и потребно им е искуство“, изјави Митровски.
Македонската репрезентација ќе ги продолжи настапите на Светското првенство, а во следните денови нови борби ги очекуваат и останатите македонски претставници.