Важно известување од МВР: Почнува примената на новите правила за мотоцикли до 125 кубици

МВР ги заврши процедурите, право на обука имаат возачи со најмалку пет години искуство со „Б“ категорија

Министерството за внатрешни работи соопшти дека се завршени сите формално-правни и технички подготовки за спроведување на законските измени поврзани со управување мотоцикли до 125 cm³. Од утре граѓаните ќе можат да посетуваат обука во автошколи кои поседуваат лиценца за категоријата „А1“.

Според МВР, обуката ќе ја реализираат автошколи што имаат овластување за „А1“ категорија, а по нејзиното завршување ќе издаваат и соодветна потврда.

„Во врска со задолжителната обука за управување на мотоцикл до 125cm³ (категорија „А1“ со автоматски менувач, до 11 kW), обука и потврди можат да спроведуваат и издаваат автошколи кои имаат лиценци за „А1“ категорија. Обуката трае четири часа и опфаќа клучни теми за безбедноста: заштитна опрема, контрола и стабилност на мотоциклот, превоз на сопатник и справување со ризици на патот“, соопшти МВР.

Потребно е лекарско уверение и немање забрана за управување

Од Министерството посочуваат дека кандидатите ќе треба да приложат лекарско уверение, како и потврда дека немаат изречена забрана за управување со возило од „Б“ категорија.

„Воедно, ги информираме граѓаните дека потребно е кандидатот да достави лекарско уверение, како и потврда дека нема забрана за управување од „Б“ категорија. Доколку лицето кое се стекнало со потврда добие забрана за „Б“ категорија автоматски повлекува и забрана за управување со потврдата“, наведуваат од МВР.

Правото да посетуваат ваква обука го имаат лица кои имаат најмалку 23 години и поседуваат важечка возачка дозвола од категорија „Б“ најмалку пет години.

Од МВР потсетуваат дека управување мотоцикл до 125 кубни сантиметри нема да биде дозволено без претходно помината теоретска обука и издадена потврда од овластена автошкола.