Претседателот на САД, Доналд Трамп, изјави дека ја поддржува целосната објава на досиејата поврзани со Џефри Епштајн, нагласувајќи дека „невини луѓе не треба да бидат повредени“. Изјавата доаѓа откако Министерството за правда најави дека ќе испрати дел од документите до Комитетот за надзор на Претставничкиот дом, пренесе UNILAD.

„Јас поддржувам сè да биде отворено. Невини луѓе не треба да бидат повредени. Има многу луѓе кои би можеле да бидат во тие досиеја, а не заслужуваат да бидат во нив, бидејќи тој ги познавал сите во Палм Бич. Им реков на Пам и на сите други, дајте им сè што можете да им дадете, бидејќи тоа е демократска измама, целата работа со Епштајн е демократска измама. Тоа е голема измама,“ рече Трамп во Белата куќа.

Претходно администрацијата на Трамп се соочи со притисок да ги објави таканаречените досиеја на Епштајн, за кои постојат теории дека содржат список на богати и моќни личности поврзани со осудениот педофил. Министерството за правда во минатото тврдеше дека таков список не постои и дека нема да објавува дополнителни документи.

Сепак, сега е најавено дека сите материјали на ФБИ, вклучувајќи го и сведочењето на големата порота, ќе бидат достапни за јавноста. „Тоа е преувеличена измама. Можам да го кажам ова – тие документи ги управувал најлошиот олош на Земјата. Тие ги водел Коми, тие ги водел Гарланд, тие ги водел Бајден и сите тие луѓе кои всушност ја воделе владата. Тие документи ги управувале тие луѓе. Тие ги воделе моите непријатели. Ако имало нешто во нив, тие ќе го искористеле за изборите,“ изјави Трамп.