Рускиот претседател Владимир Путин вчера гласаше онлајн на изборите за новата Државна дума, долниот дом на рускиот парламент. Гласањето започна вчера и ќе трае до недела, а се избираат сите 450 пратеници. Ова се првите парламентарни избори во Русија по почетокот на руската инвазија врз Украина во 2022 година. Повеќе од 111 милиони гласачи имаат право на глас, а овозможено е и електронско гласање, пренесува АП.

Кремљ објави снимка на која се гледа како Путин седи пред компјутер во својата канцеларија и го спроведува процесот на електронско гласање. Тој се навали блиску до мониторот, неколку моменти внимателно гледаше во екранот и кликна со глувчето за да го регистрира својот глас. Снимката од неговото гласање брзо се прошири на социјалните мрежи.

Откако на екранот се појави потврда дека успешно гласал, Путин рече „ви благодарам“. Видеото од гласањето на Путин набрзо стана предмет на шеги на социјалните мрежи. Многумина забележаа дека тој се навалил многу блиску до мониторот и ги стеснувал очите додека читал од екранот, што поттикна некои да се шегуваат дека му се потребни очила.

 

Бројни коментари

Други се забавуваа од многу внимателното користење на глувчето од страна на Путин и неговата силна концентрација додека правеше неколку кликања. Откако Путин конечно рече „ви благодарам“, се прошири шега дека рускиот претседател всушност си се заблагодарува самиот на себе.

Внимание привлече и еден друг детал. Во аголот на мониторот на Путин е видлива пораката „Activate Windows“ (Активирајте го Windows), што укажува на тоа дека оперативниот систем Windows на тој компјутер не е активиран. Ова исто така поттикна шеги на социјалните мрежи, особено во контекст на западните санкции против Русија.

Уште во март 2022 година, по почетокот на руската инвазија врз Украина, Microsoft ја прекина продажбата на нови производи и услуги во Русија и ги намали своите активности во земјата за да се усогласи со санкциите воведени од САД, Европската Унија и Обединетото Кралство. Сепак, пораката на екранот на Путин не открива зошто Windows не бил активиран.

Први парламентарни избори од почетокот на инвазијата

Ова се првите парламентарни избори во Русија од почетокот на руската инвазија врз Украина во 2022 година. Гласањето се одвива и во делови од украинската територија што се под руска контрола. Украина и Европската Унија го сметаат ваквото гласање за незаконско и изјавија дека нема да ги признаат резултатите од окупираните области.

На изборите учествуваат десет партии, од кои сите ги поддржуваат клучните политики на Владимир Путин и војната во Украина. Единствената регистрирана партија што отворено се спротивстави на војната – либералната „Јаблоко“ – беше отстранета од националната изборна листа со одлука на Врховниот суд на Русија. Сепак, некои од нејзините кандидати сепак се кандидираат во поединечни изборни единици.

Критичарите тврдат дека изборите не се ниту слободни ниту фер, додека „Ројтерс“ го опишува рускиот политички систем како строго контролиран. Изборните места беа отворени вчера во 8:00 часот наутро по локално време.