Белгија ги елиминираше САД од Светското првенство
Репрезентацијата на САД го заврши настапот на Светското првенство по убедливиот пораз од Белгија со 4-1 во осминафиналето. Американците имаа големи очекувања на домашен терен, но белгиската селекција беше поквалитетна, поконкретна и поопасна во клучните моменти од натпреварот.
Ова е вторпат Белгија да ги елиминира САД во осминафинале на Светско првенство, откако истото се случи и во 2014 година во Бразил. Овојпат поразот беше уште поубедлив и претставуваше тежок крај за американската репрезентација.
Златан со кратка и јасна порака
По елиминацијата на САД, вниманието на јавноста го привлече реакцијата на Златан Ибрахимовиќ, кој на својот Инстаграм објави видео што брзо стана хит на социјалните мрежи.
Во негов стил, Ибрахимовиќ испрати кратка, јасна и директна порака: „Се вика фудбал, а не сокер“.
Реакцијата веднаш предизвика бројни коментари, особено поради фактот што САД како домаќин на турнирот имаа големи амбиции, но не успеаја да направат чекор повеќе против силната Белгија.
Ибрахимовиќ: САД се соочија со реалноста
Златан претходно даде и директна анализа за американскиот „FOX“, во која оцени дека САД играле против подобар противник. Според него, Белгија била подобра и според статистиката и според случувањата на теренот.
„Тие играа против подобар тим“, изјави Ибрахимовиќ.
Тој додаде дека ова бил најслабиот натпревар на САД на турнирот, но и дека елиминацијата не треба целосно да го засени нивниот настап. Според Ибрахимовиќ, Американците направиле максимум што можеле во овој момент, но дуелот со Белгија покажал каде реално се наоѓаат во однос на најсилните фудбалски репрезентации.
„Денешниот резултат не е добар, но на крајот мислам дека турнирот беше добар. Тие направија максимум што можеа на овој турнир. Да, може да имате среќа и да одите подалеку, но мислам дека ова беше средба со реалноста за САД“, порача Ибрахимовиќ.
Белгија со победата од 4-1 продолжува понатаму, додека САД се збогуваат од Светското првенство со болна елиминација и порака од Златан која стана една од најсподелуваните реакции по натпреварот.