Влатко Стефановски во Сплит го прими Поринот за животно дело, на концертна вечер што ја исполни до последно место салата „Иво Тијардовиќ“.
Наградата му беше врачена во пресрет на 33. издание на Порин, како признание за неговиот особен придонес и долгогодишно влијание врз хрватската и регионалната музичка сцена.
Настанот не беше само формално доделување награда, туку концерт што се претвори во омаж за неговата кариера. Стефановски уште еднаш го покажа својот препознатлив стил, спојувајќи македонски мелос, рок и виртуозна гитара во единствен музички израз.
Според хрватските медиуми, концертот бил распродаден, а атмосферата повеќе личела на оддавање почит отколку на класична концертна вечер.
Во образложението за наградата, Стефановски беше истакнат како гитарист со меѓународна кариера и како еден од најважните музички автори на овие простори.
Со ова признание, неговото име повторно се потврдува како едно од најзначајните во регионалниот културен простор, симбол на кариера што не губи на актуелност и влијание.