Денеска низ Франција се одржуваат собири за поддршка на Палестинците во Појасот Газа, а најголемо внимание е насочено кон Париз, каде властите го забранија протестот.
Бројни полициски сили се распоредени во Париз за да ги растурат демонстрациите, бидејќи организаторите рекоа дека ќе ја прекршат забраната за одржување на протести.
Полицијата нареди затворање на продавници во работничка населба на северот на Париз, од каде што требаше да започне прошетката, откако судот потврди дека не смее да се одржи.
Како причина за забрана на протестниот марш, судот ги наведе немирите и судирите со полицијата на забранетиот про-палестински протест во 2014 година, поради тогашната израелска офанзива во Појасот Газа.
Организаторите на собирот во Париз изјавија дека имаат намера да ги осудат „најновите агресии на Израел“ и да ја одбележат годишнината од протерувањето на стотици илјади Палестинци од територијата на денешен Израел, откако таа земја прогласи независност во 1948 година.
„Стоп за анексијата. „Палестина ќе победи“, стоеше на еден од транспарентите.
Полицијата изјави дека ќе употреби водени топови против демонстрантите кои ја кршат забраната за собири.
Протести се одобрени во голем број француски градови, вклучувајќи ги Лил и Марсеј.
Француските власти стравуваат дека натамошната ескалација на конфликтот меѓу Израел и палестински Хамас, кој владее со појасот Газа, може да доведе до насилни протести во Франција.