Во среда во Собранието гласање за нов државен јавен обвинител
Владиниот предлог за избор на судијата од Кривичниот суд, Ненад Савески, за нов државен јавен обвинител веќе е доставен до Собранието. Одлуката за неговиот избор треба да биде донесена на пленарната седница закажана за среда, на 18 март.
Потребни најмалку 61 глас во Собранието
За Савески да биде избран за шеф на Јавното обвинителство потребна е поддршка од најмалку 61 пратеник во Собранието. Пратениците на пленарната седница ќе треба да се изјаснат за владиниот предлог за оваа функција.
Владата се повикува на принципите на професионалност
Од Владата соопштуваат дека при предлагањето на кандидатот се воделе од принципите на професионалност, интегритет, стручност и доследна посветеност на владеењето на правото.
Во тек и постапката за нов закон
Во меѓувреме, во вторник е закажана јавна расправа за Предлог-законот за Јавно обвинителство. Овој закон претходно на пленарна седница доби зелено светло за продолжување на законодавната постапка.
Извор: МРТ