Пријавувањето започнува на 30 јуни, ранг-листи ќе има на 2 јули
Полуматурантите кои не успеаја да се запишат во средно образование во првиот рок, ќе имаат нова можност на 30 јуни, кога започнува второто електронско пријавување за учебната 2025/2026 година. Според Министерството за образование и наука (МОН), на располагање се вкупно 16.034 слободни ученички места во јавните средни училишта ширум државата.
Од нив, 10.758 се во паралелки со настава на македонски јазик, 4.781 на албански, 474 на турски и 21 место на српски наставен јазик. Најголемиот дел од понудените места се во стручните училишта – 12.307, наспроти 3.727 места во гимназиско образование, што укажува на растечкиот интерес за стручно образование во Македонија.
Ранг-листите на 2 јули, квалификациско тестирање за спорни случаи на 4 јули
Според утврдениот распоред, доставата на потребната документација ќе се одвива на 1 јули, а конечните ранг-листи со примени ученици ќе бидат објавени до 12:00 часот на 2 јули. Таму каде што ќе има повеќе кандидати со исти поени од бројот на слободни места, ќе се организира квалификациско тестирање на 4 јули.
Јаневска: Оценките да бидат реални – нема повеќе „усогласување“ од наставнички совети
Министерката за образование и наука Весна Јаневска апелираше за објективност при оценувањето на учениците, нагласувајќи дека „петки за сите“ станале штетна практика која го руши квалитетот на образовниот систем.
„Апелирам до наставниците да ги оценуваат учениците реално, бидејќи според новите законски измени, повеќе нема да постои можност наставничките совети да ги менуваат оценките“, истакна Јаневска.
За оние кои нема да се запишат ниту во јунскиот рок, последна шанса ќе има во август – електронското пријавување ќе биде на 21 август, а конечните ранг-листи ќе бидат објавени на 22 август.