Владата на Русија привремено го забрани извозот на одредени видови петрохемиски производи, со исклучок на земјите членки на Евроазиската економска унија (ЕАЕУ). Оваа одлука стапува на сила веднаш со цел заштита на домашниот пазар.
Привремената забрана е воведена со цел да се обезбеди стабилно снабдување со суровини за домашните индустриски претпријатија. Оваа мерка ќе важи три месеци и ги опфаќа испораките на катран од јаглен, нафтен бензен, толуен, ортоксилен, параксилен и фенол.
Овие производи, меѓу другото, се користат во производството на бои и лакови за автомобилската и авијациската индустрија, бродоградбата и железничкиот сектор, како и за производство на амбалажа за храна, подни материјали, изолација за кабли и медицински производи.
Покрај земјите членки на ЕАЕУ, од забраната се изземени и петрохемиските производи што се превезуваат во рамките на меѓународен транзит, се испраќаат како меѓународна хуманитарна помош или се наменети за руски организации на норвешкиот архипелаг Свалбард. Испораките на овие хемикалии од Русија веќе се предмет на санкции од Европската Унија.