Половина од Русите го поддржаа шефот на групата Вагнер, Евгениј Пригожин, во бунтот против Кремљ, изјави денеска украинскиот претседател Володимир Зеленски, врз основа на податоците на Киевската разузнавачка служба.
„Половина Русија го поддржа Пригожин. Половина Русија го поддржа Путин. Некои руски региони, во меѓувреме, балансираа не знаејќи кого да поддржат. Сите го гледаме овој процес, што покажува дека половина од руското население е во сериозен сомнеж“, рече Зеленски во интервју за Си-Ен-Ен.
Тој додаде дека рускиот претседател Владимир Путин, соочен со последиците од бунтот на Вагнер, ќе се обиде да го „консолидира своето општество“.
„Тој ќе направи се за да ја урне и уништи славата на групата Вагнер и сето она што тие го постигнаа. Ќе се огради од сето тоа и опширно ќе комуницира за да го обедини општеството“, рече Зеленски.
Украинскиот претседател рече дека е забележливо што Путин не се појавил во јавноста откако платеничката група започнала и ставила крај на својот хаотичен бунт.
„Каде исчезна Путин по сите овие настани? Ретко излегува на сонце, го гледаме само во кабинетот“, додаде Зеленски.