Американскиот државен секретар Марко Рубио ја оценува Србија како земја вклучена во „потенцијално проблематични и експлозивни прашања кои привлекуваат меѓународно внимание“, но истовремено потврди дека САД сакаат да го продлабочат своето стратегиско партнерство со Белград.
„Јасно е дека Србија е вклучена во одредени прашања кои се потенцијално проблематични и експлозивни, а кои привлекуваат меѓународно внимание.“
Рубио истакна дека Вашингтон има намера да ги зацврсти односите со Србија, а истовремено да работи на решавање на потенцијалните тензии кои, како што рече, длабоко ја загрижуваат и самата Србија.
„И ние имаме намера да го сториме тоа, а во исто време да ги решаваме потенцијалните проблеми кои би можеле да се појават, за кои знам дека длабоко ја загрижуваат самата Србија.“
Американскиот државен секретар напомена дека претставници на Стејт департментот и други владини агенции веќе ја посетиле Србија и изрази надеж дека и тој наскоро ќе има можност за официјална посета.
„Се надевам дека ќе имам можност да ја посетам.“
Во јули годинава, САД и Србија потпишаа Меморандум за разбирање за енергетска инфраструктура и регионална енергетска безбедност во рамките на процесот на стратегиски дијалог во Вашингтон, а средбата беше отворена од Рубио.
Во август, пратеници од двата крила на Конгресот поднесоа предлог-закон со кој се предлагаат мерки против Србија поради „сериозни назадувања“ во демократијата и владеењето на правото, како и заради соработката со Русија, Кина и Иран.
Според предлог-законот, извештаите за човекови права за 2024 година и за Србија на Европскиот парламент за 2025 година укажуваат на значајни проблеми во судската независност, слободата на медиумите и корупциски пракси.
Републиканецот Џо Вилсон, предлагач на предлог-законот, изјави:
„Србија под претседателот Александар Вучиќ намерно се оддалечува сè повеќе и повеќе од владеењето на правото и се приближува до непријателите на слободата, како што се воениот злосторник Путин, Комунистичката партија на Кина и терористичкиот режим во Техеран.“
Иако е кандидат за членство во Европската Унија, Србија речиси пет години не отворила ниедно ново поглавје во преговорите за пристапување, делумно поради недостаток на напредок во владеењето на правото и несогласувања со надворешната политика на ЕУ.