Германските медиуми со брутални реакции по поразот
По елиминацијата на Германија од Светското првенство, во земјата продолжуваат жестоките реакции, проследени со остри наслови и критики во дел од највлијателните германски медиуми.
„Билд“ на својата насловна страница резултатот го опиша како „следниот германски фудбалски кошмар“, додека колумнистката Марион Хорн остро ја критикуваше реакцијата на германскиот канцелар Фридрих Мерц по поразот.
Критики и кон канцеларот Мерц
Мерц на својот официјален профил на платформата X порача дека, иако елиминацијата боли, германската репрезентација со посветеноста и тимскиот дух ја воодушевила земјата и дека граѓаните се горди на играчите.
Хорн, пак, оцени дека таквата објава е „катастрофа“ и „разорна“, додавајќи дека поразот од Парагвај, како и настапот, ставот и работата на тимот, се симптоматични за состојбата во германскиот фудбал. Таа посочи дека Германија, наместо да се стреми кон врвот, сè повеќе живее од старата слава, а фудбалот, според неа, останува натпреварувачки спорт во кој второкласен третман не смее да се прифаќа.
Сличен став изнесе и колумнистот на „Ди Велт“, Улф Пошард, кој напиша дека Германија повторно прерано го напушта Светското првенство и дека нема причина за гордост по ваков настап.
„Кикер“ и „Зидојче цајтунг“ со критики за Нагелсман
Фудбалскиот медиум „Кикер“ резултатот го оцени како сериозна критика за германскиот фудбал и за селекторот Јулијан Нагелсман. Главниот репортер Оливер Хартман напиша дека германската репрезентација е најголемото разочарување на турнирот досега и дека Нагелсман не успеал да ги искористи и развие силните страни на тимот.
Во „Зидојче цајтунг“, коментарот на Клаудио Катуоњо беше објавен со наслов дека некој треба да му каже на Нагелсман дека „ова не може да продолжи“, додека главната анализа на весникот порача дека Германија сега не може да победи ниту на пенали.