Пожари во Калифорнија: Жртви, евакуации и големо уништување

Жртви, повредени, стотици изгорени куќи. Заглавени автомобили, чад и плач – апокалиптични сцени пристигнуваат од Лос Анџелес додека шумскиот пожар продолжува да расте, а нови жаришта избиваат поради силните ветрови. Огнот се прошири и на Холивуд Хилс.

„Доживеавме огромна трагедија. Имаме пет жртви и над 100.000 евакуирани, додека дополнителни лица се предупредени за итна евакуација бидејќи се во опасната зона“, изјави Виктор Гордо, градоначалник на Пасадена, Калифорнија.

Уништување од големи размери

Неконтролираната огнена стихија која пустоши низ приморската област меѓу Малибу и Санта Моника уништи речиси 16.000 хектари површина. Истовремено, пожарот во Алтадена се заканува да пеплоса околу 13.000 објекти. Граѓаните се борат да спасат сè што е можно.

„На петмина мои пријатели им изгореа домовите. Кога огнот е разгорен од ветер, нема многу што да се направи,“ изјави Џорџ Ирачета, жител на Пасадена.

Предизвици за противпожарните екипи

Противпожарната служба се соочува со тешкотии во контролирањето на пожарот поради оптоварениот водоводен систем и прекините на струја.

„Сè уште сме во црвена тревога. Имавме прекини на струја, што влијаеше на нашиот водоводен систем. Но, дури и да имавме повеќе вода, налетите на ветерот фрлаа жарови на милји пред огнот, што го правеше контролирањето невозможно,“ изјави Чад Августин, шеф на противпожарната служба во Пасадена.

Федерална интервенција и политички тензии

Властите стравуваат дека бројот на жртви ќе продолжи да расте. Пентагон испрати опрема и персонал во погодените области, а претседателот Џо Бајден одобри федерална помош.

„Подготвени сме да направиме сè што е потребно за да ги ограничиме овие пожари и да ја вратиме нормалноста,“ изјави Бајден.

Сепак, Доналд Трамп го обвини гувернерот на Калифорнија, Гевин Њусом, за неуспех во управувањето со водните ресурси, наведувајќи дека тоа придонело за трагедијата.

„Ова е вистинска трагедија и грешка на гувернерот. Тие немаат вода, а милиони галони се на располагање од северот,“ изјави Трамп.

Како одговор, Изи Гардон, директор за комуникации на Њусом, ги отфрли обвинувањата, истакнувајќи дека Трамп шири фиктивни тврдења додека пожари пустошат низ државата.