18 семејства на настраданите од трагичниот пожар во Кочани ќе бидат поддржани со хуманитарна акција организирана од бугарскиот пратеник Манол Пејков, кој преку својата фондација собра речиси 40.000 евра за директна финансиска поддршка.
Во соработка со кризниот штаб SupportKochani, средствата се распоредуваат според приоритетни категории – семејства кои изгубиле родител, самохрани мајки, семејства со повредени деца, или социјално загрозени домаќинства. На секое од 18 семејства на настраданите ќе им бидат префрлени по 1.500 евра, од кои 15 исплати се веќе реализирани.
Пејков посочува дека околу 13.000 евра ќе останат резервирани во фондот за поддршка, кој ќе се користи за долготрајна нега, рехабилитација или други итни потреби на погодените семејства.
Вкупната сума потекнува од 624 индивидуални донации, собрани преку банкарски сметки и PayPal. Кампањата започна на 16 март и сè уште е отворена. Според објавата, сите активности се спроведуваат транспарентно преку фондацијата на бугарскиот пратеник „Манол Пејков и пријатели“.
„Секој што сака да се приклучи, може да донира преку објавените сметки. Средствата одат директно до 18 семејства на настраданите, без посредници,“ истакна Пејков.
Извор: plusinfo