Денот на Републиката: 29 ноември – празникот што го славеше СФРЈ
Денешниот датум, 29 ноември, со децении се славеше како голем празник во Социјалистичка Федеративна Република Југославија, познат како Денот на Републиката. Празникот го одбележуваше Второто заседание на АВНОЈ од 1943 година, кога беа поставени темелите на новата југословенска држава и беше конституиран законодавниот и извршниот орган на тогашна Југославија. Од 1945 година, овој ден се одбележуваше низ целата федерација со свечени академии, спортски и културни настани.
АВНОЈ и македонското државно оформување
Одлуките на АВНОЈ имаа длабоко значење за Македонија. Македонскиот народ и македонската држава беа признати како рамноправни конститутивни елементи на федерацијата, а македонскиот јазик доби статус на рамноправен со српскохрватскиот и словенечкиот. Со тоа беа политички и правно потврдени стремежите за самостоен национален развој. Овие решенија беа децидно потврдени и на Првото заседание на АСНОМ, а тврдењата дека АВНОЈ немал легитимитет за Македонија се оценуваат како дел од антимакедонски пропаганди.
Од култот кон празникот до неговото укинување
На Второто заседание на АВНОЈ присуствуваа 142 делегати, а претседаваше др. Иван Рибар. Тогаш беа поништени сите акти на претходната власт, а кралот Петар II беше прогласен за непожелен. Како посебна одлука, Тито ја доби титулата „Маршал на Југославија“. Во следните децении Денот на Републиката стана еден од најголемите државни празници: ученците стануваа пионери, се организираа приредби, а низ федерацијата се пееше „Од Вардара па до Триглава“. Последната генерација пионери е родена во 1982 година. По распадот на СФРЈ празникот постепено исчезна, а последно се славеше во Србија до неговото официјално укинување на 14 ноември 2002 година.