Договорот за реконструкција на пругата Белград-Ниш, кој ќе биде финансиран со донација од Европската унија од околу 600 милиони евра, ќе биде потпишан на крајот на февруари, и тој е најголемиот поединечен грант за проекти што Србија ги добила од ЕУ.
Договорот за реконструкција на пругата, кој ќе чини вкупно 2,2 милијарди евра, ќе биде потпишан на крајот на февруари, а на настанот ќе присуствуваат и претставници на државниот врв и Оливер Вархеји.
Веста за грантот доаѓа во време кога српските власти, заедно со косовските, добија „европски“ предлог за решавање на отворените прашања, проследен со силни политички притисоци да го прифатат.
Водечки финансиер на реконструкцијата на пругата Белград-Ниш е Европската инвестициска банка која одобри заем од 1,1 милијарда евра. Европската банка за обнова и развој издвои 550 милиони евра, а дел ќе се финансира од српскиот буџет. Грантот од ЕУ во износ од 600 милиони евра е преку Инвестициската рамка за Западен Балкан.
Реконструкцијата на пругата Белград-Ниш е еден од најважните железнички проекти во Србија. Во рамки на проектот ќе се реконструира и пругата во должина од околу 230 километри. Квалитетот на патничките и товарните услуги ќе биде значително подобрен, бидејќи возовите, кога ќе заврши линијата, ќе се движат со брзина до 200 километри на час.
Делницата треба да биде завршена до 2029 година, така што до крајот на оваа деценија патниците ќе можат да патуваат со брза железница од Ниш до Белград, а потоа до Будимпешта.