Приоритетно вработување, специјализации и поголема транспарентност
Министерството за здравство го објави новиот предлог за измени и дополнувања на Законот за здравствената заштита, поставен на Единствениот национален електронски регистар на прописи (ЕНЕР). Со тоа, сите засегнати страни можат да достават коментари и предлози кои ќе бидат разгледани пред финалното усвојување.
„Се водиме од принципите на транспарентност и отчетност и сите конструктивни забелешки, мислења и сугестии ќе бидат земени во предвид во финалната верзија на новиот предлог закон за здравствената заштита. Од досегашната примена на законот произлезе потреба да се направат измени и дополнувања во делот на постапката за вработување здравствени работници и соработници во ЈЗУ, статусот на директорите на јавните здравствени установи, специјализациите и супспецијализациите, како и условите за пензионирање на здравствените работници и работа по пензионирањето, како и усогласување со други прописи“, појаснува министерот Азир Алиу.
Меѓу клучните измени е предвидено приоритетно вработување на најдобрите дипломирани доктори на медицина од домашните факултети.
„За нив, доколку се пријават на оглас за вработување, нема да се спроведува постапка за селекција на кандидат, туку тие приоритетно ќе се вработуваат во јавната здравствена установа“, додава Алиу.
Составот на комисијата за селекција ќе го предлага стручниот колегиум за секое огласено работно место, а директорот е должен да го вработи најдобро рангираниот кандидат.
Во делот за специјализации и супспецијализации, Владата ќе донесува програма за бројот на приватни специјализации, во согласност со потребите за медицински кадри. Дополнително, се овозможува ангажирање искусни лекари од дефицитарни специјалности до навршување 70 години, при што ќе ја задржат пензијата.
„Ангажирањето ќе биде врз основа на согласност од Министерството за здравство и Фондот за здравственото осигурување, доколку нема повеќе услови за извршување на определена здравствена дејност или за непрекината дејност“, нагласува министерот.
Со овие измени се цели подобрување на квалитетот на здравствената услуга, зачувување на стручен кадар и создавање поефикасни и транспарентни процедури за управување со човечките ресурси во здравството.