Агенцијата за аудио и аудиовизуелни медиумски услуги (АВМУ) остро ги осуди ставовите на претседателот на партијата „Македонски Концепт“, Петар Богојески, изнесени во телевизиска емисија на ТВ Алфа, оценувајќи дека со нив се релативизира и оправдува насилството врз жените и децата.
„Агенцијата ги осудува ставовите на Петар Богојески со кои се релативизира и оправдува насилството врз жените и децата, се промовира нивната подредена положба и се прави обид таквите сфаќања да се претстават како традиционални вредности. Ваквите пораки се неприфатливи и се во спротивност со основните принципи на почитување на човековите права, еднаквоста и човечкото достоинство“, се наведува во денешното соопштение на АВМУ.
Од Агенцијата потенцираат дека насилството, понижувањето и нееднаквоста не претставуваат традиционални вредности и не можат да бидат оправдани под каков било изговор.
„Особено е недозволиво физичкото насилство врз децата да се претставува како прифатлив начин на воспитување, или насилството врз жените како нормален дел од семејните односи“, нагласуваат од регулаторното тело.
Реакцијата на АВМУ следува по извршениот увид во емисијата „Под лупа“, емитувана на ТВ Алфа на 2 ноември 2026 година, на тема „Распадот на македонското семејство: Меѓу насилството, разводите и судирот на традицијата и модерното време“.
Во емисијата учествувале Петар Богојески, претседател на „Македонски Концепт“, и адвокатката Катерина Котеска, специјализирана за семејно право и семејно насилство.
Во своето соопштение, Агенцијата посебно се осврнува и на улогата на новинарката која ја водела емисијата, оценувајќи дека таа постапувала во согласност со професионалните новинарски стандарди.
Според АВМУ, новинарката поставувала релевантни прашања, ги доведувала во прашање изнесените тврдења и барала нивно дополнително образложение.
Од Агенцијата потсетуваат дека секој учесник во јавна дебата, особено јавните личности, носи лична одговорност за ставовите што ги изнесува и пораките што ги испраќа до граѓаните.
Истовремено, нагласуваат дека улогата на професионалното новинарство е да отвора прашања од јавен интерес, да овозможува аргументирана дебата и критички да ги преиспитува изнесените тврдења, со цел јавноста да добие релевантни информации и самостојно да формира мислење.
Со ова соопштение, АВМУ јасно ја разграничува одговорноста на гостите за нивните јавно изнесени ставови од професионалната одговорност на медиумот и новинарот што ја води дебатата.