Претставници на десет австриски компании на 15 и 16 септември престојуваа во Скопје за да разговараат со македонски компании и институции за можни заеднички проекти. Дводневната деловна мисија, организирана од Трговското одделение при Амбасадата на Австрија, беше насочена кон воспоставување нови контакти и долгорочни партнерства.
Австриските компании остварија средби и со претставници на политичкиот и деловниот сектор. Тие ја претставија својата експертиза во производството на енергија, железничката и транспортната инфраструктура, инженерството, градежното советување, паметните технологии и одржливата мобилност. На разговорите се разгледуваше како нивното техничко знаење и искуство може да се поврзат со капацитетите на македонските компании и со инфраструктурните потреби на земјата.
Во рамки на посетата се одржа и австриско-македонска деловна тркалезна маса. На неа учествуваа заменик-премиерот и министер за транспорт Александар Николоски, министерката за енергетика, рударство и минерални суровини Сања Божиновска, претседателот на Стопанската комора Бранко Азески, градоначалникот на Скопје и претседател на ЗЕЛС Орце Ѓорѓиевски и заменик-директорот на претпријатието за железничка инфраструктура Шериф Абдулахи.
Според организаторите, разговорите отвориле простор за продлабочување на соработката во развојот на современи, безбедни и одржливи инфраструктурни решенија. Од Трговското одделение оценуваат дека австриската технологија и искуство може да се надополнат со познавањето на локалниот пазар и капацитетите на македонските компании.
Мисијата овозможила нови деловни контакти и зајакнување на постојните односи. Организаторите очекуваат тие во иднина да придонесат за конкретни проекти во транспортот, енергетиката и одржливата инфраструктура.