Опозицискиот лидер од Тирана обвини за корупција, измама и обид за блокада на правосудството
Лидерот на Демократската партија, Сали Бериша, упати сериозни обвинувања кон владата на премиерот Еди Рама за време на редовниот понеделнички собир пред владата во Тирана.
Бериша ја оцени актуелната власт како „најсрамниот и најраспаднатиот режим во Европа и светот“, наведувајќи дека функционира врз основа на измама, пропаганда и измислици.
Според него, корупцијата е присутна насекаде во државата и директно ги погодува граѓаните.
– Каде и да го допрете, тече кражба, кражба и само кражба на Албанците, изјави Бериша пред поддржувачите.
Обвинувања за државен удар и блокирање на правдата
Настапувајќи на собирот именуван „говорница“, опозицискиот лидер истакна дека граѓаните се решени да ѝ ја дадат на сегашната влада казната што ја заслужува.
Тој го обвини премиерот Рама дека ја турка земјата кон државен удар и дека го блокира правосудниот систем.
– Режимот очекува од нас, граѓаните, да му ја дадеме казната што ја заслужува, рече Бериша, додавајќи дека премиерот секојдневно ги понижува Албанците.
Повик за протести и „година на антидиктатурата“
Во завршницата на говорот, Бериша повика на отпор и политички промени, најавувајќи дека 2026 година ќе биде „година на антидиктатурата“.
Тој ја опиша како година на победа на граѓаните против автократијата, при што изрази поддршка и за актуелните случувања во Венецуела и Иран.
Лидерот на Демократската партија упати и повик за масовен антивладин протест на 24 јануари.
Бериша ги повика граѓаните, интелектуалците и младите да се обединат во, како што рече, вистински опозициски фронт со цел уривање на „наркодиктатурата“.