Проект за одржливо управување со отпад во Хорека-индустријата
Девет хотели од Охридската ривиера започнуваат со примарна селекција на комуналниот отпад како дел од заложбите на Општина Охрид за одржливо управување во угостителството. Акцијата се однесува на хотелите, рестораните и кафулињата на крајбрежјето и во градот.
Проектот „Одржливо управување со отпад на локално ниво“, реализиран од Ј.П. „Охридски комуналец“ и „SALAR International“ од Шведска, обезбеди инструкции, обука за персоналот и материјали за примарна селекција на отпад во хотелите.
„Селекцијата на отпад во хотелите и другите угостителски објекти, кои се меѓу најголемите создавачи на отпад, е клучен дел од успешно спроведување на системот“, велат од „Охридски комуналец“.
Проширување на системот по крајбрежјето
Следниот чекор предвидува вклучување на сместувачки и угостителски објекти покрај охридското шеталиште, со план за проширување на сите останати објекти долж крајбрежјето.
„Овие активности се комплементарни на проширувањето на мрежата од домаќинства кои ќе бидат вклучени во системот за примарна селекција. Процесот е комплексен и се спроведува за прв пат во Охрид, што бара флексибилност и разбирање од сите чинители. Со заеднички напори, поддршка од државата и свесноста на учесниците за важноста на промените, трансформацијата ќе биде успешна“, додаваат од претпријатието.
Моделот на работење што се воспоставува во Охрид ќе може да се реплицира и во други туристички центри во регионот, како Струга и Крушево.