Милорад Додик реагираше на смртта на Ратко Младиќ со тврдење дека поранешниот командант на Војската на Република Српска не добивал соодветна медицинска нега во Хаг и дека неговата смрт може да се смета за „убиство“. За ваквото тврдење засега нема докази, а Меѓународниот резидуален механизам за кривични судови соопшти дека е наредена целосна истрага за околностите под кои Младиќ починал.
Додик изјави дека задржувањето на Младиќ во притвор и покрај неговата тешка здравствена состојба било нехумано и оцени дека со подобра медицинска грижа тој можел да живее подолго.
„Тоа е убиство“, изјави Додик во реакцијата по веста за смртта на Младиќ, додавајќи дека тој бил почитуван меѓу Србите и дека како командант, според него, „застанал во одбрана на српскиот народ“. Слична порака испрати и Воислав Шешељ, кој исто така тврдеше дека Младиќ бил „убиен“.
Додик потсети и дека своевремено сведочел во одбраната на Младиќ пред Хашкиот трибунал и го пофали неговото однесување во текот на процесот. Во реакцијата повторно го спомена и Насер Ориќ, оценувајќи дека е неправедно што тој е на слобода, додека Младиќ ја издржувал доживотната казна.
Младиќ почина денеска додека бил хоспитализиран во Хаг. Тој со месеци бил во болничкото одделение на притворската единица на Обединетите нации, а здравствената состојба во последниот период значително му се влошила. Судските документи од мај покажуваат дека лекарите тогаш оцениле дека се наоѓа во терминална фаза на болеста, дека претрпел мозочен удар и дека прогнозата била исклучително лоша. Независните медицински експерти наведувале и дека неговата здравствена состојба била внимателно следена и дека медицинскиот третман бил во согласност со меѓународните стандарди.
По неговата смрт, холандските власти ги започнаа стандардните процедури и истраги предвидени со тамошното законодавство. Претседателката на Механизмот, судијката Грасиела Гати Сантана, нареди и посебна целосна истрага за околностите на смртта, која ќе ја води судијата Иан Бономи.
Младиќ беше осуден на доживотен затвор во 2017 година за геноцид, злосторства против човештвото и воени злосторства, а пресудата беше правосилно потврдена во 2021 година. Меѓу злосторствата за кои беше осуден е геноцидот во Сребреница во 1995 година, кога беа убиени повеќе од 8.000 бошњачки мажи и момчиња, како и кампањата на терор врз цивилното население во Сараево.
Наспроти реакциите на Додик и Шешељ, претставници на семејствата на жртвите порачаа дека смртта на Младиќ не ја менува правосилната пресуда. Генералниот секретар на ОН Антонио Гутереш, преку својот портпарол, истакна дека судски утврдените факти се конечни и повика политичките лидери да не ги негираат злосторствата ниту да ги величаат лицата осудени за геноцид и воени злосторства.