Организацијата бара дополнителни средства за борба со вирусот, додека бројот на заразени продолжува да расте
Светската здравствена организација (СЗО) предупреди дека вистинскиот обем на епидемијата на ебола во Демократска Република Конго може да биде значително поголем од официјално регистрираните случаи.
Според проценките на организацијата, бројот на заразени може да биде два до четири пати поголем од досега потврдените случаи.
„Според нашите проекции, обемот на епидемијата се проценува дека е најмалку два до четири пати поголем од бројот на регистрирани случаи“, изјави Чикве Ихеквеазу, раководител на Програмата за здравствени итни случаи на СЗО.
Тој додаде дека капацитетите за откривање нови случаи се подобруваат секој ден.
СЗО добила само дел од потребните средства
Ихеквеазу предупреди дека СЗО има недостиг од финансиски средства за справување со епидемијата и ги повика донаторите да продолжат со поддршката во критичниот период.
Организацијата досега добила околу 40 проценти од 115-те милиони долари што ги побара за сузбивање на епидемијата предизвикана од сојот бундибугија.
За овој вид ебола сè уште не постои докажан метод на лекување ниту вакцина.
Според податоците на властите, досега се заразени најмалку 1.926 лица, а 702 лица починале од болеста.
„Оваа епидемија бара ресурси соодветни на обемот на проблемот со кој се соочуваме. И тоа не е товар што ДР Конго може сама да го носи“, рече Ихеквеазу.
Тој оцени дека одговорот на епидемијата се наоѓа во критична фаза, особено откако нови случаи се појавија во две дополнителни провинции.
Според него, потребно е засилено откривање и изолирање на заразените лица за да се спречи понатамошно ширење на вирусот.
„Малку е како маратон. Не можете да се откажете по првиот или вториот круг. Само треба да продолжите да притискате дури и кога сте уморни и исцрпени“, порача Ихеквеазу.