Европската централна банка (ЕЦБ) ги зголеми каматните стапки од 2,25 на 2,5 проценти, предупредувајќи дека обновените судири на Блискиот Исток можат дополнително да ја зголемат инфлацијата во текот на следната година.
Одлуката доаѓа во период на силен раст на цените на енергенсите. Нафтата „брент“ надмина 105 долари за барел, а во пораст се и цените на гасот во Европа, што ги зголеми и трошоците за задолжување на државите и компаниите.
Во Велика Британија, државниот долг достигна највисоко ниво во последните 19 години, додека приносите на европските државни обврзници забележаа остар раст по скокот на цените на нафтата и гасот. Најновото зголемување на цените на енергенсите следува по нападите на САД и Иран врз бродови во Ормускиот теснец.
ЕЦБ ја зголеми и прогнозата за економскиот раст во еврозоната за 2026 година, од 0,8 на 0,9 проценти, но во исто време очекува просечната инфлација годинава да достигне три проценти. Централната банка оцени дека базичната инфлација, која не ги вклучува најнестабилните компоненти како храната и енергијата, засега останува стабилна.
Инвеститорите очекуваа повисоки камати, но особено внимание предизвика поостриот тон на ЕЦБ и предупредувањето дека инфлациските притисоци се шират низ повеќе сектори од економијата.
Цената на гасот во континентална Европа дополнително се зголеми. Референтната холандска цена за природен гас за првпат од јануари 2023 година достигна 80 евра за мегават-час, додека договорите за испорака во следниот месец се искачија на 82,56 евра.
Централните банки стравуваат дека високите цени на горивото и енергијата ќе доведат до зголемување на транспортните трошоци и поскапо греење за деловните и станбените објекти. Тоа може да предизвика нов бран поскапувања и дополнително да го зголеми инфлацискиот притисок врз европската економија.