Ангел Георгиев, од проруската партија „Преродба“ на Костадин Костадинов е бугарскиот пратеник кој беше приведен од македонската полиција откако ги нападна македонските граничари.
Станува збор за контроверзен пратеник од Пловдив, кој доаѓа од партија сателот на официјална Москва. Оваа политичка партија е една од ретките во Бугарија која ја поддржува руската инвазија на Украина. Тој се упатил кон Македонија со намера да предизвика конфликт во Скопје на роденденот на револуционерот Гоце Делчев. Но, откако неколку часа чекал на границата затоа што падна системот на граничната полиција, тој ги нападнал полициските службеници што може да се види на видеото.
Како што пишува бугарскиот портал „24 Часа“, бугарски државјани подолго време биле задржани на граничните пунктови за Северна Македонија. Денеска многу луѓе патуваат поради 151-годишнината од раѓањето на Гоце Делчев. Но, македонските власти долго време не ги пуштаа автомобилите со образложение дека имаат проблем со системот.
Бугарските портали објавија и видео преземено од фејсбук профилот на Георгиев, кој покажува автомобили наредени, кои со часови чекаат да ја поминат границата.
Во видеото се слуша како маж вика кон граничарите дека македонските власти привеле маж од автомобил кој чекал на граница.
„Зошто го внесовте, зошто го правите ова“, им викал човекот на граничарите. После тоа започнал судир меѓу македонските граничари и Бугарите.
Пратеникот од „Вазраждане“ пред две недели стана татко. Од прес центарот на партијата засега нема информации за неговата состојба, пишува бугарскиот портал „24 Часа“.