Патиштата и граничните премини привремено слободни
Патиштата низ Грција и граничните премини кон соседните земји ќе бидат целосно проодни во наредните три дена, откако грчките земјоделци донесоа одлука привремено да ги прекинат блокадите до петок. Со оваа мерка, како што наведуваат, се овозможува непречено празнично патување за граѓаните.
„Евзони“ останува целосно отворен
Граничниот премин Евзони, кој во изминатиот период беше повремено блокиран, во следните денови ќе функционира без ограничувања. Иако тракторите и понатаму се распоредени во близина на границите и долж патиштата, земјоделците уверуваат дека тие нема да го попречуваат сообраќајот.
Протестите продолжуваат по празниците
Земјоделците најавуваат дека протестите започнати на 30 ноември ќе продолжат и по празниците. Одлука за натамошните активности ќе биде донесена на заеднички состанок закажан за недела кај патарината Малгара, во близина на Солун. Нивните барања остануваат непроменети и се однесуваат на исплата на заостанатите субвенции, намалување на високите производствени трошоци, подобри откупни цени и расчистување на скандалот со европските земјоделски фондови.