Одделот за сузбивање на организиран криминал и корупција спроведува истрага против организирана криминална група осомничена за изнуда, лихварство, перење пари, закани и насилство.
Засилено полициско присуство и специјални полициски сили утрово се забележани на повеќе локации во Куманово, каде што, според неофицијални информации, се спроведува обемна полициска операција насочена кон разбивање на организирана криминална мрежа.
Во фокусот на истрагата е група која, според сомневањата на истражните органи, подолг временски период дејствувала во Куманово и поширокиот регион, користејќи закани, уцени и насилство за остварување противправна материјална корист.
Според неофицијалните информации, за наводен организатор на групата се сомничи лице познато под прекарот „Штука“, а во истрагата се опфатени и други лица од Куманово.
Особено внимание привлекува фактот што, покрај објекти и локации поврзани со осомничените, истражните органи проверуваат и нотарска канцеларија и менувачница, каде што се испитуваат можни врски со финансиските текови поврзани со истражуваните активности.
При досегашните претреси, според неофицијалните информации, биле пронајдени парични средства, возила и документација која би можела да биде важна за понатамошната истрага.
Акцијата е резултат на подолготрајна оперативно-истражна работа на полициските служби, во координација со Јавното обвинителство за гонење на организиран криминал и корупција.
Се очекува институциите да излезат со официјални информации за опфатот на акцијата, бројот на приведени лица и евентуалните кривични пријави.
Куманово утрово е во центарот на голема истрага против сомнителни криминални структури. Дали ова е почеток на пошироко разоткривање на мрежа која со години дејствувала во регионот, останува да покаже истрагата.