Сушата веќе станува реалност која го менува секојдневието. Историски нискиот водостој на Дунав за првпат по 52 години влијае врз работата на нуклеарната централа „Козлодуј“.
„Козлодуј“ ја намалува моќноста
Поради ниското ниво на Дунав, петтиот реактор на нуклеарната централа „Козлодуј“ ја намалува моќноста за околу 120 мегавати, како превентивна мерка. Централата работи нормално, но се очекува водостојот на реката дополнително да се намалува.
Според бугарскиот нуклеарен физичар и експерт Георги Касчиев, намалувањето на моќноста нема да се почувствува кај потрошувачите, бидејќи земјата извезува значителни количества електрична енергија, а не се очекува ниту влијание врз цените.
Ниските водостои ја погодуваат и Унгарија и Романија
Ниските водостои претходно влијаеја и врз нуклеарните централи во Унгарија и Романија. Во Унгарија, нуклеарната централа „Пакш“ го намали производството, додека сушата влијаеше и врз земјоделството и туризмот.
Езерото Веленце е значително повлечено, поради што јавните плажи се затворени. Експертите посочуваат дека проблемот не е само во сушата, туку и во долгогодишното одведување на водата од полињата и мочуриштата наместо нејзино задржување.
Повлекување на реките и екстремни температури
Во Србија, нискиот водостој на Сава го откри стариот пароброд „Словенец“, познат како „Титаник на Сава“, кој потонал во 1945 година. Хидролозите предупредуваат дека ваквите екстремни појави ќе стануваат сè почести, со можност за многу ниски нивоа на водата, но и нагли порастувања, историски максимуми и ненадејни поплави.
Во Тунис, температурите до 50 степени Целзиусови предизвикаа недостиг на вода и електрична енергија, по што граѓаните излегоа на улиците барајќи подобри основни услуги.
Сушата, екстремните горештини и пожарите веќе се присутни на повеќе континенти. Реките се повлекуваат, водата се намалува, а температурите рушат рекорди.