Владата, предводена од коалицијата Вреди, преку Министерството за транспорт, започнува нова фаза во изградбата на Железничкиот коридор 8 – проект со национална димензија и регионално значење. Со одлука на Владата, одобрен е грант од 3,7 милиони евра обезбеден од Европската инвестициска банка, информираше Вреди преку соопштение.
„Средствата се наменети за подготовка на нова проектна документација и спроведување на постапка за тендерирање. Паралелно, Јавното претпријатие за железничка инфраструктура ја започна и постапката за избор на надзор на изградбата, со цел да се гарантира транспарентност и ефикасност во процесот“, се вели во соопштението.
Заменик-министерката за транспорт, Калтрина Зеколи Шаќири, истакна дека министерството е целосно посветено на унапредување на железничките проекти, оценувајќи ги како клучни столбови за економски развој, регионална соработка и национална интеграција.
Коридорот 8, кој треба да ја поврзе Македонија со Албанија – од Скопје до Тирана и пристаништето Драч – е дел од европските транспортни коридори и има потенцијал да ја позиционира земјата како важен транзитен центар на Балканот. Проектот, според Владата, претставува повеќе од инфраструктурна инвестиција – тој е симбол на економско поврзување, регионално единство и зајакнување на позицијата на Албанците во регионот.
„Железничките линии не се само линии на мапа, тие се артерии на развој кои ќе го поттикнуваат напредокот на граѓаните и на целата земја со децении“, порачуваат од Вреди.