Кешишев сведочеше за киднапирањата и убиствата: „Мислев дека копаме злато“
По отстранувањето на Љупчо Палевски од судницата за да не го плаши и за да може слободно да сведочи, обвинетиот Влатко Кешишев даде свој исказ.
Кешишев со уплав од Палевски, се плаши да сведочи во негово присуство
Тој изјави дека од 2021 година волонтерски му готвел и чистел на Палевски додека ја формирал партијата „Десна“.
Кешишев е и сведок и обвинет во случајот за грабнувањата и убиствата на Панче Жежовски и Вања Ѓорчевска. Додека јавноста ја бараше Вања, тој ја однесе полицијата на местото каде што била закопана и во детали ги опиша двата настани.
На директно прашање од адвокатот, Кешишев призна дека учествувал во копање дупка во Велес.
„Вељо копаше, јас фрлав земја. Мислев дека бараме, копаме злато. Молчевме, не разговаравме. Третиот пат кога отидовме, Вељо ме предупреди дека за ова може глави да летаат и дека не смее да се зборува. Четвртиот пат ја довршивме дупката, а Велибор ја поклопи со даски. Се вративме во штабот, му кажавме на Палчо дека сè е во ред, дека дупката има доволна длабочина,“ сведочеше Кешишев.
На прашањето дали бил присутен на разговори за теми неповрзани со партијата, тој одговори потврдно.
„Да, ги слушав како зборуваат за грабнување. Поминаа околу две години и ништо не се случуваше, мислев дека тоа било само желба и фантазија.“
Тој исто така раскажа дека му кажал на Палчо дека го бараат да работи, но овој му рекол дека му треба и дека не може да си замине. Дури и му го донел кучето да го чува.
На прашањето кој бил иницијатор за темата за грабнување, Кешишев изјави:
„Не знам кој беше иницијатор, но Велибор го почнуваше тој муабет.“
Потоа сведочеше за ранецот со опремата за киднапирање, радиостаниците што се гледаат на снимките од камерите на Велибор Манев, и дека во целата операција учествувале четворица: тој, Палевски, Манев и Боре Видевски, кој претходно негираше било каква поврзаност со злосторствата.
Според Кешишев, планот бил Панче Жежовски да биде грабнат заради неговото возило.
„Првиот пат не успеаја, јас ги чекав во „Реното Кангу“. Вториот пат останав во колата, ги чекав еден час. Се вратија тројцата со зелена „Ситроен“ кола. Запаливме по едно цигаре, тогаш Палчо го фрли мобилниот телефон на Панче во долот, во капините. До мене седна Велибор, а во „Ситроенот“ беа Палчо и Боре,“ раскажа обвинетиот-сведок.
По ова, отишле на местото „Рудник“, каде што била ископана дупката.
„Чекав. Се врати Вељо и ми кажа да возам за Катланово. Палчо по токи-воки му кажа на Вељо да се паркираме на поголем паркинг. Кога пристигнаа, Палчо го бришеше воланот од траги.“
Кешишев тврди дека не го видел Панче Жежовски на паркингот, но дознал од разговорите дека бил во гепекот, завиткан во ќебе.
„Кога дојдовме во штабот на партијата во Скопје, тогаш сфатив дека Панче всушност е убиен.“
Неговото сведочење, во кое детално признава сè, продолжува за грабнувањето и убиството на 14-годишната Вања Ѓорчевска.
Извор: СДК