Мицкоски: Не сум осудил никого во изјави – Обвинителството ќе се произнесе за пожарот во Кочани

Мицкоски за истрагата за пожарот во Кочани

Во рамки на собраниска седница посветена на прашања од пратеници, премиерот Христијан Мицкоски одговори на забелешките на пратеникот Блерим Беџети од ДУИ во врска со истрагата за пожарот во Кочани, истакнувајќи дека предметот е сè уште во фаза на обработка и оти Јавното обвинителство ќе се произнесе во наредниот период.

Мицкоски нагласи дека досега ниту еднаш не изразил осуда кон поединци и повика на воздржаност од предвремени квалификации сè додека не се утврдат фактите.

„Истрагата е сè уште во тек, колку што сум информиран од страна на МВР, кое по службена должност комуницира со ЈО. Во рамки на таа истрага претпоставувам дека ќе има нови елементи или нема да има – Јавното обвинителство ќе се произнесе во периодот што следува. Јас никогаш не сум се изразил така како што вие велите, да осудам кого било предвреме,“ истакна премиерот, одговарајќи на прашањето на Беџети.

Пратеникот од ДУИ го обвини Мицкоски дека предвремено ги именувал осомничените, наместо тоа да го направи обвинителството, со што, според него, се поткопува независноста на судството.

„Владата тврди дека ќе има правда, но вистинската правда произлегува од судот, не од политички прес-конференции. Како може премиерот да говори за фалсификувани документи пред правосудните институции да се произнесат?“, праша Беџети.

Во одговорот, Мицкоски додаде дека изразил сомнежи за постоење на фалсификувана лиценца, но без да именува одговорни лица. Потенцираше дека документот што бил презентиран не одговара на архивските податоци од Министерството за економија, што било констатирано по проверка на архивски број.

Истовремено, премиерот потсети дека во периодот од 2008 година наваму, со Министерството за економија управувале кадри предложени од ДУИ, но подвлече дека тоа не е основа за конкретни обвинувања.

„Не сакам да алудирам или да донесувам заклучоци предвреме. Ајде да почекаме и тогаш да утврдиме дали постоела селективност и дали ќе има други осомничени функционери. Но, само тогаш. Ве молам, немојте во меѓувреме да испраќате пораки и инсинуации какви што испраќате во континуитет,“ изјави Мицкоски.

Пратеникот Беџети во својот настап го критикуваше и отсуството на министерот за животна средина, Изет Меџити. Toj бараше негово задолжително присуство на идните сесии кога се поставуваат пратенички прашања. Ваквото барање есо цел – како што рече – да се почитува институционалниот дијалог.