Холивудскиот актер Николас Кејџ привремено не може да живее во својот дом вреден 10,5 милиони долари во Малибу. Свлечиште и силна крајбрежна ерозија предизвикаа огромно пропаѓање на земјиштето точно пред неговата луксузна резиденција, поради што актерот моментално престојува по хотели.
Шеесет и двегодишниот актер отворено зборуваше за овој проблем во саботата за време на настанот „Лос Анџелес комик кон“, откако беше прашан за плановите за прославата на Халовин. Тој објасни дека поради непредвидената хаварија со земјиштето морал целосно да ги промени своите вообичаени планови.
„Моментално сум малку бездомник. Нешто се случи со мојата куќа во Малибу, па главно живеам по хотели. Затоа вечерва нема да ги имам вообичаените дечиња што доаѓаат по слатки, а во тоа инаку би уживал“, рече Кејџ.
Покрај непријатната ситуација, актерот најави дека планира да ја однесе својата четиригодишна ќерка Август во Санта Моника, каде што таа ќе учествува во традиционалното собирање слатки од врата до врата. Потоа, откако неговата ќерка ќе заспие, Кејџ планирал да ја помине вечерта гледајќи го култниот хорор-класик „Сјаење“ на режисерот Стенли Кјубрик.
Проблемот со имотот започнал на 8 септември, кога земјиштето пред вилата ненадејно почнало да пропаѓа, создавајќи огромна дупка токму на местото каде што претходно минувал пристапниот пат до гаражата. Асфалтот и бетонот комплетно се урнале, а во длабоката провалија завршиле мобилен тоалет од блиско градилиште и заштитни огради. Експертите претпоставуваат дека пропаѓањето е директна последица на крајбрежната ерозија, обилните дождови и силните океански бранови.
Опасноста не е ограничена само на вилата на холивудскиот актер. Поради прогресивното ширење на оштетувањата и блокирањето на патот, градските власти во Малибу официјално прогласија вкупно 31 имот за небезбеден. Притоа, седум куќи се категоризирани како крајно опасни за живеење, додека за уште 24 пристапот со возила е оневозможен, што претставува ризик доколку има потреба од интервенција на противпожарните служби или полицијата.
Кејџ нема намера да се откаже од својата вредна вила сместена непосредно покрај океанот, која ја купи во 2024 година. Тој веќе поднел барања и добил градежни дозволи за санирање на штетата, што вклучува поставување заштитни вреќи со песок покрај брегот за забавување на ерозијата, расчистување на урнатините и подготовка на теренот за поставување потпорни столбови.