Европскиот процес го блокираат условувања, Владата вели „доста е“
Министерот за внатрешни работи, Панче Тошковски, во интервју за ИБНА изјави дека европскиот процес не се наоѓа во застој, туку во состојба на неправда. Тој порача дека Европа мора да се соочи со прашањето дали регионот навистина е дел од нејзината иднина.
„Тоа што се случува со европскиот процес е повеќе од застој, тоа е неправда. Европската идеја не смее да се сведува на билатерални уцени“, рече Тошковски, пренесе дописничката на МИА од Атина.
Министерот ја нагласи посветеноста на Владата на реформите и борбата против корупцијата, додавајќи дека тие чекори се прават не поради притисоци, туку за доброто на државата.
„Ќе продолжиме да работиме на владеење на правото, борба против корупција, затоа што тоа е потребно за нашето општество. Но, истовремено, ќе го кажеме јасно и достоинствено нашето ‘доста е’. Европа мора да одговори – дали Балканот е дел од нејзината иднина? Ако одговорот е да, тогаш вратите треба да се отворат со почит, а не со нови барања“, додаде Тошковски.
Граничниот премин Маркова Нога – Лемос како симбол на партнерство
Изјавата на министерот е дадена за време на неговата посета на општината Преспа во Грција, каде што започна изградбата на граничниот премин Маркова Нога – Лемос. Тој потенцираше дека овој премин е повеќе од инфраструктурен проект.
„Тоа е симбол на зрелост, одговорност и европска перспектива. За регионот на Преспа, ова значи нова енергија – економска, туристичка и културна. Локалните заедници добиваат шанса за развој, а државите покажуваат зрелост и визија“, објасни министерот.
Тошковски додаде дека преминот нема само да поврзува две држави, туку и луѓе, истории и иднината – претставувајќи позитивен пример за прекугранична соработка во Европа.
Соработката со Грција и мигрантскиот притисок се клучни прашања
Тошковски го оцени позитивно нивото на полициска соработка со Грција, нагласувајќи дека, и покрај политичките разлики во минатото, практичната комуникација и координација се стабилни.
„Имаме активна, континуирана комуникација – посебно во делот на размена на информации, заеднички операции и справување со прекугранични закани“, рече министерот.
Тој посочи и на важноста од подобрување на граничниот проток на преминот Богородица – Евзони:
„Тоа е главната комуникациска артерија за целиот регион. Ефикасен премин е прашање на економија, безбедност и европска интеграција во пракса“, истакна Тошковски, најавувајќи интензивирање на дијалогот со грчките власти.
Во делот за мигрантското прашање, тој го потенцираше придонесот на земјава, иако не е членка на ЕУ:
„Ние сме на клучна миграциска рута кон Европа и постапуваме одговорно, професионално, како вистински партнер. Нашата полиција секојдневно ја штити јужната граница на Европа. Тоа е конкретен придонес кон европските вредности, не декларативно, туку реално“, изјави Тошковски.
Преспанскиот договор и пристапот на Владата кон меѓународните обврски
Во интервјуто, министерот се осврна и на ставот на Владата кон Преспанскиот договор. Тој потенцираше дека, иако политичките ставови можат да варираат, одговорноста е повисока од емоциите.
„Ставовите на партијата се добро познати и тие не се менуваат од денес за утре. Но, кога се води државата, одговорноста е поголема од емоцијата“, изјави тој.
Тошковски додаде дека Владата ќе постапува во согласност со меѓународните обврски:
„Ние ги знаеме меѓународните обврски што мора да се почитуваат, за да се заштитиме од нови кризи и блокади. Ќе постапуваме државнички, достоинствено и со јасна цел – стабилност, просперитет и европска иднина за нашите граѓани“, заврши тој.